【Snapchat X Nike 新搞作】#DigitalMarketing #MrBusiness
鍾意睇NBA嘅籃球迷，通常都會對籃球鞋情有獨鍾，著一對儲又一對，如果係限量款或者聯乘款價錢仲有得大炒特炒。而NBA 全明星賽係籃球界一年一度盛事，想親身現場睇簡直一票難求，咁大盛事又多觀眾最好當然係搞噱頭做宣傳。
首先講一講Snapchat，絕對係近幾年冒起得最快嘅social media，大玩閱後即焚，用圖片或影片代替繁多文字，迅速成為25歲以下年輕人新寵兒，亦係帶動各大social media爭相模仿玩story模式嘅始祖。
而今屆NBA 全明星賽 Nike就第一次同Snapchat合作，首先Snapchat 內裡AR濾鏡裡，Nike打造Michael Jordan 1988年全明星賽入樽大賽AR影像，Snapchat用家可以影相然後同朋友分享動態濾鏡，而濾鏡動畫去到最後，Michael Jordan裝扮就會由30年前改為今年明星賽隊衫以及將會推出嘅籃球鞋，正正係今年3月會推出市場嘅Air Jordan 3 Tinker。
另外，全明星賽後就有舉辦賽後party，場上一個籃球板板上印有QR code。只要scan就會將用家帶到去Snapchat網上平台，可以率先飲頭啖湯訂購Air Jordan 3 Tinker，開售只係23分鐘籃球鞋就一掃而空，所有訂單仲會當晚十點半前送到訂購人府上。
雖然以Michael Jordan號召力，加上NBA全明星賽全球矚目程度，就算用邊一個社交平台舉辦QR code訂購籃球鞋相信都一樣成功。但今次Nike就選擇同Snapchat合作，絕對係睇中對方於年輕市場傳播能力及影響力，亦可以俾其他年輕人逐漸fade out嘅社交平台一個警號。
Search